Voorsitter se verslag

Chairman's report
Ton Vosloo - voorsitter
 

OORSIG

Dit is Naspers se eerste geïntegreerde jaarverslag aan belanghebbendes, ooreenkomstig die aanbevelings van King Report on Governance for South Africa 2009 (“King III”) – hersiene riglyne oor korporatiewe bestuurstoesig in Suid-Afrika en in ooreenstemming met wêreldwye beste praktyk. Ons poog om ’n gebalanseerde oorsig van ons ekonomiese, sosiale, omgewings- en bestuurstoesig-bedrywighede vir die jaar tot 31 Maart 2011 weer te gee.

As direksie hou ons toesig oor die strategiese rigting waarin die maatskappy beweeg. Ons rapporteer graag dat ons resultate ’n toename van 18% in gekonsolideerde omset en 13% in kernwesensverdienste weerspieël. Sterk groei is behaal in die internet- en betaaltelevisieondernemings. Ons drukmedia-ondernemings het matig herstel, terwyl die tegnologiesegment sy marges verbeter het.

Die internetbedryf het gedurende die jaar sy sterk groei voortgesit, veral in ontluikende markte – Naspers se strategiese kundigheidsgebied. Die veerkragtigheid van ons betaaltelevisieondernemings onderstreep die belangrikheid van gehalte-inhoud, hoewel die stygende verkrygingskoste ten opsigte van intekenare en sportregte marges onder druk plaas. Die omset van ons drukmedia-ondernemings was beskeie, net soos dié van hul eweknieë wêreldwyd.

 

Operasioneel het ons goeie vordering gemaak om plaaslike inhoud en vaardighede in belangrike betaaltelevisie-markte soos Suid-Afrika en Nigerië te verhoog (hier). ’n Belangrike ontwikkeling is dat Naspers in lande met opvoedkundige uitdagings die omvang van sy opvoedkundige en geletterdheidsinisiatiewe bestendig uitgebrei het. Ons ondersteun ook die ontwikkeling van industrieë met potensiaal om werk te skep en vaardighede te ontwikkel, soos die rolprentbedryf en joernalistiek. Die MIH Media Lab borg topstudente vir nagraadse studie op die gebied van nuwe media – hierdie program bevorder die ontwikkeling van entrepreneurs en brei die talentpoel uit. Elektriese krag is duidelik van deurslaggewende belang vir hierdie inisiatiewe en in lande waar voorsiening in die gedrang kom, het ons alternatiewe kragbronne verkry.

BESTUURSTOESIG

Bestuurstoesig en volhoubaarheid is noodsaaklik vir ons belanghebbendes. Die direksie bedryf die groep se sake met integriteit, deur die toepassing van geskikte korporatiewe bestuurstoesigbeleid en -praktyke in elke maatskappy in die groep.

Verskeie filiale van Naspers word deur onafhanklike direksies beheer, wat almal hul eie bestuurstoesigpraktyke en subkomitees het wat aan die nodige bestuurstoesig- en regulatoriese vereistes voldoen. ’n Gedissiplineerde rapporteringstruktuur verseker dat die beheermaatskappy se direksie kennis dra van filiale se bedrywighede, risiko’s en geleenthede.

Gedetailleerde strategieë en sakeplanne word deurentyd hersien, en dek die finansiële en nie-finansiële elemente van elke maatskappy se besigheid, en prestasie teenoor teikens is die grondslag van bestuur se vergoeding.

Naspers evalueer deurentyd gebiede waar bestuurstoesig op korporatiewe vlak en by filiale versterk kan word. Die impak van die nuwe Maatskappywet in Suid-Afrika, asook die King III-kode oor korporatiewe bestuurstoesig, was die afgelope jaar ’n fokuspunt.

Die direksie het in 2009 ’n plan vir die toepassing van King III in al ons internasionale ondernemings goedgekeur. Goeie vordering is gemaak en die omvang van die toepassing van King III binne die bestuurstoesig-raamwerk van Naspers, MIH, MultiChoice en Media24 word op hier van hierdie verslag beskryf.